សហគ្រាសធុនតូច និងមធ្យម និងសិប្បកម្ម ផ្នែកកម្មន្តសាលជាង១ ២០០មូលដ្ឋាន បានចុះបញ្ជីក្នុងឆ្នាំ២០២៤

ភ្នំពេញ៖ ក្នុងឆ្នាំ២០២៤ សហគ្រាសធុនតូចនិងមធ្យម និងសិប្បកម្ម ផ្នែកកម្មន្តសាល បាន​ចុះបញ្ជីសរុបចំនួន ១ ២៩២មូលដ្ឋាន ក្នុងនោះចុះបញ្ជីថ្នាក់កណ្តាល​បានចំនួន១៧ មូលដ្ឋាន, ចុះបញ្ជីអាជីវកម្មតាមថ្នាលបច្ចេកវិទ្យាព័ត៌មានចំនួន ៣៣៨​មូលដ្ឋាន តាមបណ្ដាមន្ទីររាជធានី ខេត្តចំនួន ៨៣១មូលដ្ឋាន និងចុះ​បញ្ជីនៅតាមរាជធានី ខេត្ត ក្រុង ស្រុក ខណ្ឌ បានចំនួន ១០៦មូលដ្ឋាន។ នេះបើយោងតាមរបាយការណ៍​ស្តីពីលទ្ធផល​ការងារឆ្នាំ២០២៤​និង​ទិសដៅការងារឆ្នាំ២០២៥ នៃក្រសួង​ឧស្សាហកម្ម វិទ្យាសាស្ត្រ បច្ចេកវិទ្យា​និងនវានុវត្តន៍ ដែល​បញ្ចេញឱ្យដឹង​កាលពីពេលថ្មីៗនេះ ។

របាយការណ៍បន្តថា ឆ្នាំ២០២៤ដដែល ក្រសួងក៏បានចេញវិញ្ញាបន​បត្រ​ដំណើរការចំនួន ១ ០៥២មូលដ្ឋាន និង វិញ្ញាបន​បត្របន្តចំនួន ១ ៣៣៨​មូលដ្ឋាន ដែលបង្កើតបានការងារថ្មីចំនួន ២៥ ៨៣៣នាក់។

គិតត្រឹមដំណាច់ឆ្នាំ២០២៤ ទិន្នន័យស្ថិតិសហគ្រាសធុនតូច និងមធ្យម និងសិប្បកម្ម មានសរុបចំនួន ៤៣ ៩៧០មូលដ្ឋាន (សហគ្រិនស្រ្តី មាន៨៣២៥មូលដ្ឋាន)និង ពលកម្មចំនួន ៤៧៦ ២២៣នាក់ (ស្ត្រី ១៤៤ ៥៥៩នាក់)៕