ត្រាំ ថា នឹងជជែកជាមួយ មេដឹកនាំកាណាដា និងម៉ិកស៊ិក ក្រោយការប្រកាសយកពន្ធ

 ប្រភព៖ AFP

វ៉ាស៊ីនតោន៖ ប្រធានាធិបតីអាមេរិក លោក ដូណាល់ ត្រាំ បាននិយាយថា នៅថ្ងៃចន្ទសប្តាហ៍នេះ រូបលោកនឹងពិភាក្សាអំពីការយកពន្ធ ជាមួយកាណាដានិងម៉ិកស៉ិក បន្ទាប់ពីលោកបានប្រកាសដាក់លើ​ប្រទេសទាំងពីរ កាលពីចុងសប្តាហកន្លងទៅ។

ចិន ម៉ិកស៊ិក និងកាណាដា សុទ្ធតែជាដៃគូពាណិជ្ជកម្មធំៗទាំង៣ របស់សហរដ្ឋអាមេរិក ហើយបានប្តេជ្ញាដូចគ្នាថា នឹងចេញវិធានការសងសឹកវិញ នៅពេលដែលវិធានការពន្ធរបស់លោក ត្រាំ ត្រូវចាប់ផ្តើមអនុវត្ត នៅថ្ងៃអង្គារសប្តាហ៍នេះ។

ថ្លែងប្រាប់ក្រុមអ្នកសារព័ត៌មាន ក្រោយធ្វើដំណើរត្រឡប់មករដ្ឋធានីវ៉ាស៉ីនតោនវិញ កាលពីយប់ថ្ងៃអាទិត្យ ទី២ ខែកុម្ភៈ បន្ទាប់ពីបាន​ចំណាយពេលចុងសប្តាហ៍ នៅរដ្ឋ Florida លោក ត្រាំ បាននិយាយថា រូបលោកនឹងជជែកជាមួយ នាយករដ្ឋមន្រ្តីកាណាដា លោក Justin Trudeau នៅព្រឹកថ្ងៃចន្ទ ទី៣ ខែកុម្ភៈ (ពេលវេលានៅអាមេរិក) ហើយលោកក៏នឹងជជែកជាមួយ ប្រធានាធិបតីម៉ិកស៉ិក លោកស្រី Claudia Sheinbaum នាព្រឹកថ្ងៃដដែល ផងដែរ។

ក្រៅពីប្រកាសយកពន្ធក្នុងអត្រា២៥ភាគរយ លើទំនិញកាណាដានិងម៉ិកស៊ិក លោក ត្រាំ បានប្រកាសយកពន្ធបន្ថែម ១០ភាគរយទៀត លើទំនិញរបស់ចិនផងដែរ៕