ពលរដ្ឋកាណាដា ធ្វើពហិការនិងបង្ហាញសាមគ្គីភាពជាតិ ប្រឆាំងនឹងការដំឡើងពន្ធរបស់ ត្រាំ

 ប្រភព៖ Reuters

អូតាវ៉ា៖ ប្រជាជនកាណាដា កំពុងបង្ហាញប្រតិកម្មយ៉ាងខ្លាំង ចំពោះការប្រកាសរបស់ ប្រធានាធិបតីអាមេរិក ដូណាល់ ត្រាំ ពីវិធានការដំឡើងពន្ធ ២៥% លើទំនិញកាណាដាភាគច្រើន ដែលប្រតិកម្មទាំងនោះរួមមានការលុបចោលគម្រោងធ្វើដំណើរទៅអាមេរិក ធ្វើពហិការ ផលិតផលអាមេរិក និងរួមទាំងការស្រែកហ៊ោចំអកក្នុងព្រឹត្តិការណ៍កីឡា។

ទោះបីជា លោក ត្រាំ បានសន្យាថានឹងដាក់ពន្ធលើប្រទេសកាណាដានិងម៉ិកស៊ិកមុនពេល ចូលកាន់តំណែងមកម៉្លេះក៏ដោយ ក៏ការប្រកាសនេះនៅតែធ្វើឱ្យប្រជាជនកាណាដាជាច្រើន មានការភ្ញាក់ផ្អើលយ៉ាងខ្លាំង។ អភិបាលក្រុង Windsor លោក Drew Dilkens បានលើកឡើងថា «វាមានអារម្មណ៍ ដូចជាការរៀបចំរចនាសម្ព័ន្ធពិភពលោកឡើងវិញ» ដែលពិបាកនឹងទទួលយកបាន។

ជាការឆ្លើយតបនាយករដ្ឋមន្ត្រីកាណាដា Justin Trudeau បានប្រកាសដំឡើងពន្ធសងសឹកលើទំនិញអាមេរិក។ លោកក៏បានជំរុញ ឱ្យជនជាតិកាណាដា គាំទ្រផលិតផលក្នុងស្រុក និងជ្រើសរើសយកគោលដៅទេសចរណ៍ ក្នុងប្រទេសសម្រាប់វិស្សមកាលរបស់ពួកគេ។ ការអំពាវនាវនេះត្រូវបានគាំទ្រ ដោយមន្ត្រីមូលដ្ឋានជាច្រើន៕