UN ៖ ជម្លោះថ្មីនៅភាគឦសានស៊ីរី អាចនឹងបង្កផលវិបាកយ៉ាងធំធេង

 ប្រភព៖ Reuters

បេរូត៖ បេសកជនពិសេសរបស់អង្គការសហប្រជាជាតិ (UN) សម្រាប់ស៊ីរី លោក Geir Pedersen បាននិយាយថា ភាពតានតឹងនៅភាគឦសាននៃប្រទេសស៊ីរី​ រវាងកងកម្លាំងគាំទ្រដោយសហរដ្ឋអាមេរិក និងកងកម្លាំងគាំទ្រដោយតួកគី គួរតែត្រូវបានដោះស្រាយតាមរយៈដំណោះស្រាយនយោបាយ បើពុំដូច្នោះទេនឹងបង្កទៅជាផលវិបាកយ៉ាងធំធេងដល់ស៊ីរីទាំងមូល។

លោក Geir Pedersen បានគូសបញ្ជាក់ថា៖«ប្រសិនបើស្ថានការណ៍ក្នុងតំបន់ភាគឦសានមិនត្រូវបានដោះស្រាយដោយត្រឹមត្រូវទេ នោះវាអាចនឹងបង្កជាផលវិបាកយ៉ាងធំធេងដល់ស៊ីរីទាំងមូល ឬបង្កទៅជាវិបត្តិជនភៀសខ្លួន សាជាថ្មី»។

ជម្លោះបានកើនឡើងជាលំដាប់រវាងក្រុមឧទ្ទាមស៊ីរីគាំទ្រដោយតួកគី និងកងកម្លាំងប្រជាធិបតេយ្យស៊ីរី (SDF) គាំទ្រដោយសហរដ្ឋអាមេរិក នៅឯភាគឦសាននៃប្រទេសស៊ីរី​ ចាប់តាំងពី របបដឹកនាំរបស់លោក Bashar al-Assad ដួលរលំកាលពីថ្ងៃទី៨ ខែធ្នូមក។ ក្រុមឧទ្ទាមគាំទ្រដោយតួកគី បានវាយដណ្ដើមទីក្រុង Manbij ពី SDF កាលពីថ្ងៃទី៩ ខែធ្នូ ហើយអាចនឹង ត្រៀមលក្ខណៈវាយប្រហារលើទីក្រុង Kobani ឬទីក្រុង Ayn al-Arab ស្ថិតនៅភាគឦសានជាប់ព្រំដែនជាមួយតួកគី។

SDF ដែលស្ថិតនៅក្រោមការដឹកនាំដោយក្រុមឧទ្ទាមឃើដ YPG ត្រូវបានស្នើឱ្យដកកងកម្លាំងរបស់ខ្លួនចេញពីតំបន់ភាគឦសាន ជាថ្នូរនឹងបទឈប់បាញ់ពេញលេញមួយ។ ប៉ុន្តែ រដ្ឋមន្ត្រីការបរទេសតួកគី លោក Hakan Fidan បានលើកឡើងក្នុងជំនួបជាមេដឹកនាំថ្មីរបស់ស៊ីរី ក្នុងទីក្រុងដាម៉ាស កាលពីអាទិត្យសប្ដាហ៍មុនថា YPG ត្រូវរំលាយចោលទាំងស្រុង។ តួកគីចាត់ទុក YPG ជាដៃជើងរបស់គណបក្សពលករឃើដ PKK ដែលកំពុងធ្វើសកម្មភាពបះបោរប្រឆាំងតួកគី ហើយត្រូវបានចាត់ទុកជាអង្គការភេរវកម្មដោយតួកគី សហរដ្ឋអាមេរិក និងសហភាពអឺរ៉ុប៕