គយកម្ពុជា- វៀតណាមឯកភាពគ្នាបន្តពង្រឹង និងពង្រីកកិច្ចសហប្រតិបត្តិការលើចំណុចសំខាន់ៗចំនួន៨ចំណុច

វៀតណាម៖ នាថ្ងៃទី០៩ ខែធ្នូ ឆ្នាំ២០២៤ នៅទីក្រុងហាណូយ ប្រទេសវៀតណាម គណៈប្រតិភូនៃអគ្គនាយកដ្ឋានគយនិងរដ្ឋាករកម្ពុជា ដឹកនាំដោយឯកឧត្តមបណ្ឌិត គុណ ញឹម រដ្ឋមន្ត្រីប្រតិភូអមនាយករដ្ឋមន្ត្រី អគ្គនាយក នៃអគ្គនាយកដ្ឋានគយនិងរដ្ឋាករកម្ពុជា បានចូលរួមកិច្ចប្រជុំទ្វេភាគីជាមួយគណៈប្រតិភូនៃរដ្ឋបាលគយវៀតណាមដែលដឹកនាំដោយ ឯកឧត្តម Nguyen Van Tho អគ្គនាយក នៃអគ្គនាយកដ្ឋានគយវៀតណាម។

នៅក្នុងកិច្ចប្រជុំនេះ រដ្ឋបាលគយទាំងពីរបានផ្ដល់អំពីវឌ្ឍនភាពនៃការអនុវត្តការងាររបស់រដ្ឋបាលគយនីមួយៗ ដោយផ្ដោតទៅលើការប្រមូលចំណូលពន្ធនិងអាករ កិច្ចសម្រួលពាណិជ្ជកម្ម ការបង្ការនិងបង្រ្កាបបទល្មើសគេចនិងបន្លំពន្ធ និងកិច្ចសហប្រតិបត្តិការគយជាដើម។

ភាគីទាំងពីរ បានធ្វើការវាយតម្លៃខ្ពស់លើកិច្ចសហ-ប្រតិបត្តិការរបស់រដ្ឋបាលគយនៃប្រទេសទាំងពីរនាពេលកន្លងមក និងវឌ្ឍនភាពល្អក្នុងការអនុវត្តអនុស្សរណៈយោគយល់គ្នា ដែលបានចុះហត្ថលេខានាថ្ងៃទី០៤ ខែតុលា ឆ្នាំ២០១៩ នៅទីក្រុងហាណូយ ប្រទេសវៀតណាម និងកំណត់ហេតុកិច្ចប្រជុំទ្វេភាគីរវាងរដ្ឋបាលគយទាំងពីរកាលពីខែវិច្ឆិកា ឆ្នាំ២០២២ នាទីក្រុងសៀមរាប ព្រះរាជាណាចក្រកម្ពុជា។

ជាលទ្ធផល រដ្ឋបាលគយនៃប្រទេសទាំងពីរបានឯកភាពគ្នាបន្តពង្រឹងនិងពង្រីកកិច្ចសហប្រតិបត្តិការលើចំណុចសំខាន់ៗមួយចំនួនដូចខាងក្រោម៖

១. បន្តសហការគ្នាជិតស្និទ្ធដើម្បីអនុវត្តអនុស្សរណៈយោគយល់គ្នា ដែលបានចុះហត្ថលេខាកាលពីថ្ងៃទី០៤ ខែតុលា ឆ្នាំ២០១៩ និងពង្រឹងយន្តការមន្ត្រីទំនាក់ទំនង (Focal points) ជាប្រចាំ ដើម្បីផ្លាស់ប្តូរព័ត៌មានទាំងក្នុងកម្រិតអគ្គនាយកដ្ឋាន និងនៅមាត់ច្រកព្រំដែន

២. បន្តពង្រឹងកិច្ចសហការ និងសហប្រតិបត្តិការក្នុងការគ្រប់គ្រង និងសម្រួលសកម្មភាពពាណិជ្ជកម្មឆ្លងកាត់ព្រំដែន និងទំនិញឆ្លងកាត់ ដោយផ្តោតសំខាន់លើការផ្លាស់ប្តូរព័ត៌មានដើម្បីវាយតម្លៃហានិភ័យនៃទំនិញនាំចេញ នាំចូល ឬឆ្លងកាត់ និងមធ្យោបាយដឹកជញ្ជូនទំនិញឆ្លងកាត់ប្រទេសវៀតណាម

៣. បន្តពង្រឹងកិច្ចសហប្រតិបត្តិការលើការបង្ការទប់ស្កាត់ទំនិញរត់គេចពន្ធ សារធាតុគ្រឿងញៀន និងទំនិញឆ្លងដែនខុសច្បាប់ផ្សេងទៀត និងពង្រឹងយន្តការផ្លាស់ប្តូរព័ត៌មានសម្ងាត់ ព្រមទាំងចាត់តាំងមន្ត្រីជំនាញ IT ឱ្យធ្វើការរួមគ្នាដើម្បីអភិវឌ្ឍប្រព័ន្ធបច្ចេកវិទ្យាព័ត៌មានមួយសម្រាប់ផ្លាស់ប្តូរព័ត៌មានសង្ខេបតាម Online អត្តសញ្ញាណទំនិញឆ្លងកាត់ និងមធ្យោបាយដឹកជញ្ជូនទំនិញទាំងនោះ។ បន្តគាំទ្រគ្នាអនុវត្តប្រតិបត្តិការរួមគ្នា ដើម្បីប្រឆាំង និងទប់ស្កាត់ទំនិញរត់គេចពន្ធ និងទំនិញខុសច្បាប់ឆ្លងកាត់ព្រំដែន

៤.បន្តពង្រឹងប្រសិទ្ធភាពនៃកិច្ចសហប្រតិបត្តិការ កិច្ចសម្របសម្រួល និងផ្លាស់ប្តូរព័ត៌មាន រវាងសាខាគយនិងរដ្ឋាករខេត្តជាប់ព្រំដែន ទល់មុខគ្នា ដោយបានកំណត់ការរៀបចំកិច្ចប្រជុំ ប្តូរវេនគ្នា ៦ខែម្តង តាមការចាំបាច់

៥.អនុវត្តឱ្យមានប្រសិទ្ធភាពលើផែនការសកម្មភាពសហប្រតិបត្តិការរវាងរដ្ឋបាលគយនៃប្រទេសទាំងពីរ ឆ្នាំ២០២៥ និង ២០២៦ (រៀបចំផ្លាស់ប្តូរបទពិសោធន៍លើការគ្រប់គ្រងហានិភ័យ, សវនកម្មក្រោយពេលបញ្ចេញទំនិញ និងការគ្រប់គ្រងតំបន់សេដ្ឋកិច្ចពិសេសឬតំបន់កំពង់ផែសេរី, រៀបចំទស្សនកិច្ចសិក្សានៅតំបន់ខេត្តជាប់ព្រំដែន, រៀបចំកិច្ចប្រជុំទ្វេភាគីគយព្រំដែនលើកទី៦ និងលើកទី៧, និងរៀបចំកិច្ចប្រជុំទ្វេភាគីកម្រិតអគ្គនាយកគយ)

៦. បន្តសម្របសម្រួលជាមួយក្រសួងស្ថាប័នពាក់ព័ន្ធដើម្បីសិក្សាពិនិត្យលទ្ធភាពអនុវត្តយន្តការត្រួត-ពិនិត្យ រួមគ្នាតែមួយដង នៅច្រកព្រំដែនអន្តរជាតិបាវិត ប្រទេសកម្ពុជា និងម៉ុកបៃ ប្រទេសវៀតណាម

៧. គាំទ្រគ្នាទៅវិញទៅមកលើការងារគយលើឆាកអន្តរជាតិ (GMS, ASEAN, ASEM, WCO, WTO) ព្រមទាំងយន្តការសហប្រតិបត្តិការផ្សេងទៀត ពាក់ព័ន្ធនឹងតំបន់មេគង្គ

៨. រៀបចំកិច្ចប្រជុំទ្វេភាគីកម្រិតអគ្គនាយកគយបន្ទាប់ នៅព្រះរាជាណាចក្រកម្ពុជា ក្នុងឆ្នាំ២០២៦។

កិច្ចប្រជុំបានដំណើរការទៅក្រោមបរិយាកាសរីករាយស្និទ្ធស្នាលជាមិត្តភាព សហការខ្ពស់ និងបានបញ្ចប់ទៅដោយទទួលបាននូវលទ្ធផលប្រកបដោយផែ្លផ្កា៕