ក្រុមការងាររាជរដ្ឋាភិបាលចុះមូលដ្ឋានស្រុកកំពង់ត្រាច ប្រជុំត្រួតពិនិត្យរបាយការណ៍លទ្ធផលការអនុវត្តការងារប្រចាំឆ្នាំ២០២៤

អត្ថបទ៖ ទ្រី ហៀន

ខេត្តកំពត៖ ក្រុមការងាររាជរដ្ឋាភិបាលចុះមូលដ្ឋានស្រុកកំពង់ត្រាច បើកកិច្ចប្រជុំត្រួតពិនិត្យរបាយការណ៍លទ្ធផលការអនុវត្តការងារប្រចាំឆ្នាំ២០២៤ ក្រោមអធិបតីភាពដ៏ខ្ពង់ខ្ពស់ ឯកឧត្តមបណ្ឌិត ប៉ែន សុផល រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ និងជាប្រធានក្រុមការងាររាជរដ្ឋាភិបាលចុះមូលដ្ឋានស្រុកកំពង់ត្រាច​ និងលោក អូន ខន អភិបាល នៃគណៈអភិបាលស្រុកកំពង់ត្រាច និងជាអនុប្រធានអចិន្ត្រៃយ៍ក្រុមការងាររាជរដ្ឋាភិបាលចុះមូលដ្ឋា​នស្រុក។

កិច្ចនេះរៀបចំឡើងនាថ្ងៃទី២៤ ខែធ្នូ ឆ្នាំ២០២៤ នេះ ដោយមានការអញ្ជើញចូលរួមពី ឯកឧត្តម លោកជំទាវអនុប្រធាន​ក្រុមការងារថ្នាក់ស្រុក ឯកឧត្តម លោកជំទាវ លោក លោកស្រីប្រធាន អនុប្រធានក្រុមការងារចុះមូលដ្ឋានឃុំ លោក លោកស្រីអភិបាលរងស្រុក លោកនាយក-នាយករងរដ្ឋបាល ការិយាល័យជំនាញ លោក លោកស្រីមេឃុំ និងស្មៀនឃុំទាំង ១៤ឃុំ សរុបចំនួនប្រមាណ ៦០នាក់។​

ក្នុងឱកាសនោះដែរ ឯកឧត្តមបណ្ឌិតប្រធានក្រុមការងារ ក៏បានអនុញ្ញាតឲ្យក្រុមការងារធ្វើបទបង្ហាញអំពីការអភិវឌ្ឍគម្រោងជិះកង់ទេសចរណ៍ឆ្លងកាត់ស្រុកកំពង់ត្រាច និងបទបង្ហាញស្ដីពីគម្រោងអភិវឌ្ឍតំបន់ទេសចរណ៍ភ្នំទឹកធំ ស្ថិតនៅភូមិអន្លង់ថ្ងាន់ ឃុំឫស្សីស្រុកខាងកើត​ផងដែរ៕