ប្រធានាធិបតីហ្វីលីពីន ប្តេជ្ញាចាត់វិធានការឆ្លើយតប បន្ទាប់ពីមានការគំរាមកំហែងធ្វើឃាត

 ប្រភព៖ Reuters

ម៉ានីល៖ ប្រធានាធិបតីហ្វីលីពីន លោក Ferdinand Marcos Jr. បានប្តេជ្ញាចាត់វិធានការប្រឆាំងនឹងការគំរាមកំហែងធ្វើឃាត ដែលលោកចាត់ទុកថា ជាអំពើមិនសមរម្យ និងបង្កបញ្ហាដល់សន្តិសុខជាតិ។

ការប្រកាសនេះ ធ្វើឡើងបន្ទាប់ពីអនុប្រធានាធិបតី លោកស្រី Sara Duterte បានធ្វើសេចក្តីថ្លែងការណ៍មួយកាលពីថ្ងៃសៅរ៍ថា និយាយថា លោក Marcos នឹងត្រូវធ្វើឃាតភ្លាមៗ ប្រសិនបើលោកស្រីផ្ទាល់ត្រូវបានសម្លាប់។ ការគំរាមកំហែងនេះ បានបង្កើនភាពតានតឹងកាន់តែខ្លាំងឡើងរវាងលោក Marcos និងគ្រួសារ Duterte ដែលមានឥទ្ធិពលខ្លាំង នៅក្នុងនយោបាយហ្វីលីពីន។

លោក Marcos បាននិយាយនៅក្នុងសេចក្តីថ្លែងការណ៍មួយនៅថ្ងៃចន្ទនេះថា «សេចក្តីថ្លែងការណ៍ដែលយើងបានឮកាលពីថ្ងៃមុនគឺមានបញ្ហា... មាន​ការ​ប្រើ​ពាក្យ​ប្រមាថ និង​គំរាម​សម្លាប់​យើង​ ដោយ​មិនគិតពីផលលំបាករបស់វា... ខ្ញុំ​នឹង​ប្រយុទ្ធ​ប្រឆាំង​នឹង​ពួក​គេ»។

លោក Marcos បានថ្កោលទោស «ផែនការឧក្រិដ្ឋកម្ម» នេះ និងបានសន្យាថា នឹងចាត់វិធានការឆ្លើយតបយ៉ាងតឹងរ៉ឹង។ លោកបានបញ្ជាក់ថា ការគំរាមកំហែងបែបនេះមិនអាចទទួលយកបាន ហើយលោកនឹងមិនអនុញ្ញាតឱ្យមាន អំពើឧក្រិដ្ឋកម្មបែបនេះកើតឡើងឡើយ។

ដោយឡែក ក្រសួងយុត្តិធម៌នៃប្រទេសហ្វីលីពីនបានចាត់ទុក អនុប្រធានាធិបតី លោកស្រី Sara Duterte ជាមេខ្លោង នៃគម្រោងធ្វើឃាតប្រធានាធិបតី លោក Ferdinand Marcos ដោយទុកពេលឱ្យលោកស្រីចំនួន៥ថ្ងៃ ដើម្បីឆ្លើយតបចំពោះដីកាកោះហៅ។

ក្រុមអ្នកវិភាគនយោបាយមើលឃើញថា ការគំរាមកំហែងនេះ អាចប៉ះពាល់ដល់ស្ថិរភាពនយោបាយនៅហ្វីលីពីន និងបង្កើនការប្រុងប្រយ័ត្នពីសំណាក់អាជ្ញាធរ៕