មនុស្ស ៨៧ នាក់​បាន​ស្លាប់​ក្នុង​ការ​វាយ​ប្រហារ​តាម​អាកាសរបស់អ៊ីស្រាអែល​នៅ​ភាគ​ខាងជើង​តំបន់​ហ្គាហ្សា

ប្រភព៖ Reuters

ហ្គាហ្សាស៖ ក្រសួងសុខាភិបាលប៉ាឡេស្ទីន នៅថ្ងៃអាទិត្យនេះបានរាយការណ៍ឱ្យដឹងថា មនុស្សចំនួន៨៧នាក់បានស្លាប់ ឬបាត់ខ្លួននៅក្រោមគំនរបាក់បែក បន្ទាប់ពីការវាយប្រហាររបស់អ៊ីស្រាអែលកាលពីថ្ងៃសៅរ៍ លើទីប្រជុំជន Beit Lahia ភាគខាងជើងហ្គាហ្សា ហើយមនុស្សជាង៤០នាក់ទៀតបានរងរបួស។

ការវាយប្រហារនេះបានកើតឡើងនៅល្ងាចថ្ងៃសៅរ៍ ពីរសប្តាហ៍បន្ទាប់ពីការចាប់ផ្តើមនៃប្រតិបត្តិការដ៏សំខាន់មួយនៅជុំវិញទីក្រុង Jabalia ដែលមានទីតាំងនៅភាគខាងត្បូងនៃទីក្រុង Beit Lahia ជាកន្លែងដែលកងកម្លាំងអ៊ីស្រាអែលគាំទ្រដោយរថក្រោះ កំពុងព្យាយាមកំទេចយុទ្ធជនហាម៉ាសដែលនៅសេសសល់។

ក្រសួងសុខាភិបាលហ្គាហ្សាបានអះអាងថា ប្រតិបត្តិការជួយសង្គ្រោះត្រូវបានរារាំងដោយសារបញ្ហាទំនាក់ទំនង និងប្រតិបត្តិការយោធារបស់អ៊ីស្រាអែល នៅតែបន្តកើតមាននៅក្នុងតំបន់។ ជនរងគ្រោះនៅតែជាប់គាំងនៅក្រោមគំនរបាក់បែក ដោយសាររថយន្តសង្គ្រោះ និងក្រុមជួយសង្គ្រោះមិនអាចចូលទៅដល់ពួកគេបាន។

បេសកជនសន្តិភាពមជ្ឈិមបូព៌ារបស់អង្គការសហប្រជាជាតិ លោក Tor Wensland បានអំពាវនាវការការពារជនស៊ីវិល ដោយបានពិពណ៌នាទិដ្ឋភាពនៅហ្គាហ្សាថាគួរឱ្យរន្ធត់ ចំពេលការបន្តការវាយប្រហាររបស់អ៊ីស្រាអែល និងវិបត្តិមនុស្សធម៌កាន់តែអាក្រក់ទៅៗ៕