ហ្សេលេនស្គី ចង់ឱ្យមានប្រតិកម្មតបតខ្លាំងក្លា ចំពោះការចូលរួមរបស់កូរ៉េខាងជើង ក្នុងសង្រ្គាមនៅអ៊ុយក្រែន

 ប្រភព៖ Reuters

កៀវ៖ ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី បាននិយាយថាលោកកំពុងស្វែងរកប្រតិកម្មដ៏ខ្លាំងក្លាមួយពីបណ្ដាប្រទេសដែលបានដឹងថាកូរ៉េខាងជើងបាននិងកំពុងបង្កើនការចូលរួមនៅក្នុងសង្រ្គាមរបស់រុស្ស៉ីប្រឆាំងនឹងអ៊ុយក្រែន ដែលបានអូសបន្លាយពេលច្រើនជាង២ឆ្នាំកន្លះមកនេះ។

ចារកម្មកូរ៉េខាងត្បូង កាលពីថ្ងៃសុក្រសប្ដាហ៍មុនបាននិយាយថាកូរ៉េខាងជើងបានបញ្ជូនកងទ័ព ១៥០០នាក់ ទៅកាន់តំបន់ចុងបូព៌ាបំផុតរបស់រុស្ស៉ី សម្រាប់ ការបណ្ដុះបណ្ដាល និងសម្របខ្លួន មុននឹងត្រូវបានបញ្ជូនទៅជួយកងទ័ពរុស្ស៉ី នៅក្នុងសង្រ្គាមប្រឆាំងអ៊ុយក្រែន។

នៅក្នុងសុន្ទរកថាជាវីដេអូមួយកាលពីថ្ងៃអាទិត្យ ទី២០ ខែតុលា លោក ហ្សេលេនស្គី បានបន្ថែមថាវាមានភស្តុតាងពីផ្កាយរណប និងវីដេអូដែលអាចបញ្ជាក់បានថា កូរ៉េខាងជើងមិនត្រឹមតែបញ្ជូនអាវុធឱ្យរុស្ស៉ីប៉ុណ្ណោះទេ ប៉ុន្តែឥលូវ បានត្រៀមលក្ខណៈបញ្ជូនកងទ័ពទៀតផង។ លោកគូសបញ្ជាក់ថា «យើងរំពឹងថានឹងមានប្រតិកម្មខ្លាំងក្លាពីប្រទេសជាដៃគូ របស់យើងអំពីបញ្ហានេះ»។

លោកង្កត់ថា ការចូលរួមរបស់កូរ៉េខាងជើងនៅក្នុងសង្រ្គាមអ៊ុយក្រែន នឹងបំផ្លាញ ដល់អ្នករាល់គ្នា ហើយអស្ថិរភាព និងការគំរាមកំហែងអាចនឹងកើនឡើងកាន់តែខ្លាំង នៅក្រោយពេលកូរ៉េខាងជើងបានហ្វឹកហាត់សម្រាប់ការធ្វើសង្រ្គាមសម័យទំនើប។

ជុំវិញការលើកឡើងនេះ រដ្ឋមន្ត្រីការពារជាតិអាមេរិក លោក Lloyd Austin បាននិយាយថាលោកមិនទាន់អាចបញ្ជាក់បានទេថាតើកូរ៉េខាងជើងបញ្ជូនទ័ពទៅរុស្ស៉ីពិតមែន ឬយ៉ាងណាទេ ខណៈប្រមុខ NATO លោក Mark Rutte ក៏បានលើកឡើង ដូចគ្នានេះដែរថាបច្ចុប្បន្នមិនទាន់មានភស្តុតាងបញ្ជាក់ពីវត្តមានកងទ័ពកូរ៉េខាងជើង នៅអ៊ុយក្រែននៅឡើយទេ៕