ចិន ជម្លៀសប្រជាជនជាង ២៤០ ០០០នាក់ ដោយសារព្យុះភ្លៀង នៅភាគខាងកើតប្រទេស

 ប្រភព៖ AFP

ប៉េកាំង៖ ប្រព័ន្ធផ្សព្វផ្សាយរដ្ឋចិន នៅថ្ងៃពុធ ទី៣ ខែកក្កដានេះបានរាយការណ៍ថាមនុស្សជាង ២៤០ ០០០នាក់ត្រូវបានជម្លៀសទៅកាន់កន្លែងមានសុវត្ថិភាព នៅឯភាគខាងកើតនៃប្រទេស ស្របពេលព្យុះភ្លៀងកំពុងលុកលុយតំបន់ជាច្រើន និងធ្វើឱ្យកម្ពស់ទឹកទន្លេ Yangtze រួមទាំងទន្លេដទៃទៀតហក់ឡើងខ្ពស់គួរឱ្យព្រួយបារម្ភ។

ទីភ្នាក់ងារសារព័ត៌មានចិន Xinhua បាននិយាយថាព្យុះភ្លៀងបានបង្កផលប៉ះពាល់ដល់ប្រជាជន ៩៩១ ០០០នាក់ នៅក្នុងខេត្ត Anhui និងបង្ខំឱ្យមនុស្សអាជ្ញាធរជម្លៀស មនុស្ស ២៤២ ០០០នាក់ ទៅកាន់ទីទួលមានសុវត្ថិភាពគិតត្រឹមរសៀលថ្ងៃអង្គារម្សិលមិញ។

បើតាមទីភ្នាក់ងារសារព័ត៌មានរដ្ឋចិនដដែលនេះ គិតត្រឹមម៉ោង ៤រសៀល កាលពីថ្ងៃអង្គារ ព្យុះភ្លៀងបានបង្កការខូចខាតធ្ងន់ធ្ងរ នៅក្នុងតំបន់ និងស្រុកចំនួន៣៦ នៅក្នុងខេត្ត Anhui ខណៈ Yangtze ដែលជាទន្លេវែងជាងគេបំផុតរបស់ចិន មានកម្រិតទឹកហក់ឡើងខ្ពស់លើសកម្រិតប្រកាសអាសន្ន ហើយអាចនឹងបន្តកើនឡើងថែមទៀត។

បន្ថែមពីលើនេះ ព្យុះភ្លៀងក៏បានធ្វើទឹកទន្លេ ២០កន្លែង និងបឹង៦ផ្សេងទៀត នៅក្នុងខេត្ត Anhui ហក់ឡើងខ្ពស់លើសកម្រិតប្រកាសអាសន្នផងដែរ៕