ស៊ី ជីនពីង អំពាវនាវឱ្យមហាអំណាចទាំងអស់ជួយរុស្ស៉ី និងអ៊ុយក្រែនចាប់ផ្ដើមកិច្ចចរចាឡើងវិញ

 ប្រភព៖ AFP

ប៉េកាំង៖ ប្រធានាធិបតីចិន លោក ស៊ី ជីនពីង បានប្រាប់នាយករដ្ឋមន្ត្រីហុងគ្រី លោក Viktor Orban ថាបណ្ដាប្រទេសជាមហាអំណាចទាំងអស់គួរតែជួយរុស្ស៉ី និងអ៊ុយក្រែន ចាប់ផ្ដើមកិច្ចចរចាដោយផ្ទាល់ឡើងវិញ អំឡុងទស្សនកិច្ចរបស់លោក Orban ក្នុងទីក្រុងប៉េកាំង។

លោក ស៊ី ជីនពីង បានគូសបញ្ជាក់ថា មានតែនៅពេលដែលមហាអំណាចទាំងអស់បញ្ចេញថាមពលវិជ្ជមាន ចៀសវាងការបញ្ចេញថាមពលអវិជ្ជមានទេ ទើបអាចឱ្យ បទឈប់បាញ់មួយនៅក្នុងជម្លោះនេះអាចធ្វើទៅកើត ក្នុងពេលឆាប់តាមដែលអាចធ្វើទៅបាន។ លោក ស៊ី សង្កត់ធ្ងន់ដែរថាវាជាប្រយោជន៍របស់គ្រប់ភាគទាំងអស់ ដើម្បីបិទ បញ្ចប់ជម្លោះ និងស្វែងរកដំណោះស្រាយមនយោបាយមួយឱ្យឆាប់។

លោក ស៊ី ជីនពីង បានបន្ថែមថាសហគមន៍អន្តរជាតិគួរតែបង្កើតលក្ខខណ្ឌ និងផ្ដល់ជំនួយសម្រាប់ភាគទាំង២ ដើម្បីអាចឱ្យពួកគេចាប់ផ្ដើមកិច្ចចរចាដោយផ្ទាល់ឡើងវិញ។

នៅក្រោយកិច្ចប្រជុំជាមួយលោក ស៊ី ជីនពីង លោក Viktor Orban បានសរសេរនៅលើបណ្ដាញទំនាក់ទំនងសង្គម X ថាចិនគឺជាមហាអំណាចដ៏សំខាន់មួយនៅក្នុងការជួយ បង្កើតលក្ខខណ្ឌសម្រាប់សន្តិភាព នៅក្នុងសង្រ្គាមរវាងរុស្ស៉ី និងអ៊ុយក្រែន ហើយនេះជាហេតុផលដែលលោកធ្វើដំណើរទៅកាន់ទីក្រុងប៉េកាំង តែជាង២ខែប៉ុណ្ណោះក្រោយមេដឹកនាំចិន ធ្វើទស្សនកិច្ចនៅហុងគ្រី។

​ចិនបានបដិសេធថ្កោលទោសសង្រ្គាមរបស់រុស្ស៉ីប្រឆាំងអ៊ុយក្រែន ហើយកាលពីឆ្នាំ២០២៣ បានបញ្ចេញផែនការសន្តិភាពមួយសម្រាប់បញ្ចប់សង្រ្គាមនេះ។ ប៉ុន្តែ ក្រុមប្រទេសលោកខាងលិច បាននិយាយថាផែនការរបស់ចិន មានតែទុកឱកាសឱ្យរុស្ស៉ីដណ្ដើមកាន់កាប់ទឹកដីអ៊ុយក្រែនបន្ថែមតែប៉ុណ្ណោះ៕