កងរាជអាវុធហត្ថខេត្តកែប បើកកិច្ចប្រជុំពង្រឹងការងារជំនាញ និងដាក់ចេញទិសដៅអនុវត្តភារកិច្ចឱ្យកាន់តែមានប្រសិទ្ធភាព

 អត្ថបទ៖ ទ្រី ហៀន

ខេត្តកែប៖ ដើម្បីបង្កើនប្រសិទ្ធភាពការងារ សាមគ្គីភាព និងការត្រៀមលក្ខណៈសម្បត្តិក្នុងការការពារសន្តិសុខ សណ្តាប់ធ្នាប់សាធារណៈជូនប្រជាពលរដ្ឋ នារសៀលថ្ងៃទី២១ ខែសីហា ឆ្នាំ២០២៦ បញ្ជាការដ្ឋានកងរាជអាវុធហត្ថខេត្តកែប បានរៀបចំកិច្ចប្រជុំពង្រឹងការអនុវត្តតួនាទី ភារកិច្ច ការងារជំនាញ និងទិសដៅការងារចាំបាច់មួយចំនួន ក្រោមអធិបតីភាពដ៏ខ្ពង់ខ្ពស់របស់ លោកឧត្តមសេនីយ៍ត្រី ហ៊ត សីហា មេបញ្ជាការ កងរាជអាវុធហត្ថខេត្តកែប។

កិច្ចប្រជុំដ៏មានសារសំខាន់នេះ មានការអញ្ជើញចូលរួមពីសំណាក់ លោកមេបញ្ជាការរង, នាយសេនាធិការរង, ប្រធានមន្ទីរ, នាយការិយាល័យ, មេបញ្ជាការកងអនុសេនាធំចល័ត ព្រមទាំងនាយទាហាន និងនាយទាហានរង នៃកងរាជអាវុធហត្ថខេត្តកែបយ៉ាងច្រើនកុះករ។

ក្នុងឱកាសនោះ លោកឧត្តមសេនីយ៍ត្រី ហ៊ត សីហា បានដាក់ចេញនូវអនុសាសន៍ណែនាំ និងទិសដៅការងារសំខាន់ៗចំនួន ៣ចំណុច រួមមាន៖

​១៖ ការពង្រឹងវិន័យ និងប្រសិទ្ធភាពជំនាញ៖ មេបញ្ជាការបានបញ្ជាក់ធ្ងន់ៗលើការអនុវត្តតួនាទីភារកិច្ចប្រកបដោយស្មារតីទទួលខុសត្រូវខ្ពស់ ការគោរពបទបញ្ជាផ្ទៃក្នុងយ៉ាងម៉ឺងម៉ាត់ និងការបង្កើនប្រសិទ្ធភាពការងារជំនាញនៅតាមគ្រប់មន្ទីរ-ការិយាល័យចំណុះ ដើម្បីធានាឱ្យបាននូវការបំពេញភារកិច្ចប្រកបដោយរលូន និងមានលទ្ធផលខ្ពស់។
​២៖ ការថែរក្សាសន្តិសុខ និងសណ្តាប់ធ្នាប់សាធារណៈ៖ បង្កើនការយកចិត្តទុកដាក់ខ្ពស់លើកិច្ចការពារសុវត្ថិភាព សន្តិសុខ និងភាពសុខសាន្តជូនប្រជាពលរដ្ឋ រួមទាំងភ្ញៀវទេសចរជាតិ និងអន្តរជាតិ ដែលអញ្ជើញមកកម្សាន្តនៅក្នុងភូមិសាស្ត្រខេត្តកែប ដែលជាខេត្តទេសចរណ៍គំរូ និងមានសក្តានុពល។
​៣៖ ការត្រៀមលក្ខណៈអន្តរាគមន៍ ២៤/៧៖ ណែនាំដល់កងអនុសេនាធំចល័ត និងកម្លាំងពាក់ព័ន្ធទាំងអស់ ឱ្យត្រៀមលក្ខណៈរួចរាល់ជាស្រេច ទាំងកម្លាំងសរុប និងមធ្យោបាយសម្ភារ ក្នុងការឆ្លើយតបបានទាន់ពេលវេលាចំពោះហេតុការណ៍ចៃដន្យ ការបង្ក្រាបបទល្មើសផ្សេងៗ ឬប្រតិបត្តិការសង្គ្រោះបន្ទាន់ផ្សេងៗ។

លោកឧត្តមសេនីយ៍ត្រី មេបញ្ជាការ បានសម្តែងនូវការកោតសរសើរ និងបានផ្ដាំផ្ញើដល់នាយទាហាន និងនាយទាហានរងទាំងអស់ ឱ្យបន្តពង្រឹងស្មារតីសាមគ្គីភាពផ្ទៃក្នុងឱ្យបានរឹងមាំ ខិតខំបំពេញភារកិច្ចដែលថ្នាក់លើប្រគល់ជូនឱ្យសម្រេចបានលទ្ធផលល្អប្រសើរ និងជោគជ័យបន្ថែមទៀតជាបន្តបន្ទាប់ ដើម្បីបម្រើជាតិ និងប្រជាជនដោយស្មោះត្រង់៕