អត្ថបទ៖ ទ្រី ហៀន
ខេត្តកែប៖ អាជ្ញាធរខេត្តកែប នារសៀលថ្ងៃអង្គារ
ទី២៥ ខែវិច្ឆិកា ឆ្នាំ២០២៥ បានបើកកិច្ចប្រជុំពិនិត្យ
និងដោះស្រាយលើសំណុំរឿងស្នើសុំចុះបញ្ជីចេញបណ្ណកម្មសិទ្ធិដីធ្លីតាមប្រព័ន្ធ LAMP
(Land Administration Management Project) មួយករណី ដែលមានទំហំ២ហិកតា
ដើម្បីធានានូវតម្លាភាព និងភាពត្រឹមត្រូវតាមផ្លូវច្បាប់ ក្នុងការផ្តល់កម្មសិទ្ធិជូនប្រជាពលរដ្ឋ។
កិច្ចប្រជុំនេះបានប្រព្រឹត្តទៅនៅសាលប្រជុំមន្ទីររៀបចំដែនដី
នគរូបនីយកម្ម សំណង់ និងសូរិយោដី ខេត្តកែប ក្រោមអធិបតីភាពដ៏ខ្ពង់ខ្ពស់របស់ លោក ហ៊ួរ
មិថុនា អភិបាលរងខេត្តកែប ដោយមានការចូលរួមពីមន្ត្រីជំនាញពាក់ព័ន្ធជាច្រើនរូប។
ក្នុងកិច្ចប្រជុំបានពិនិត្យលម្អិត
លើឯកសារស្នើសុំចុះបញ្ជី និងផ្ទៀងផ្ទាត់ទិន្នន័យដីធ្លីតាមប្រព័ន្ធ LAMP ដោយដោះស្រាយនូវរាល់បញ្ហាប្រឈម
ឬភាពមិនប្រក្រតីណាមួយដែលបានកើតមានឡើងពាក់ព័ន្ធនឹងទីតាំងដីទំហំ ២ ហិកតានេះ និងជំរុញដំណើរការនៃការចេញបណ្ណកម្មសិទ្ធិដីធ្លីជូនម្ចាស់កម្មសិទ្ធិស្របច្បាប់
ឱ្យបានឆាប់រហ័ស និងមានប្រសិទ្ធភាព។
ថ្លែងក្នុងកិច្ចប្រជុំនោះ លោក ហ៊ួរ
មិថុនា អភិបាលរងខេត្ត បានណែនាំដល់ក្រុមការងារ
និងមន្ត្រីជំនាញឱ្យយកចិត្តទុកដាក់ខ្ពស់លើការវាស់វែង
និងកំណត់ព្រំប្រទល់ដីធ្លីឱ្យបានច្បាស់លាស់ ជៀសវាងការប៉ះពាល់ដល់ផលប្រយោជន៍សាធារណៈ
ឬជម្លោះឯកជន។
លោកក៏បានសង្កត់ធ្ងន់លើសារៈសំខាន់នៃការប្រើប្រាស់
ប្រព័ន្ធ LAMP ដែលជាឧបករណ៍ទំនើប
និងមានភាពសុក្រឹតក្នុងការគ្រប់គ្រងវិស័យដីធ្លីនៅកម្ពុជា។ ជាលទ្ធផល
ក្រុមការងារជំនាញបានឯកភាពគ្នា និងបានដាក់ចេញនូវវិធានការបន្ត ដើម្បីឈានទៅដល់ការចេញបណ្ណកម្មសិទ្ធិដីធ្លីជូនម្ចាស់ដីស្របច្បាប់
តាមនីតិវិធីដែលបានកំណត់៕
