គណៈកម្មាធិការអភិវឌ្ឍន៍ទេសចរណ៍ខេត្តកំពត បើកកិច្ចប្រជុំពិនិត្យរបាយការណ៍បញ្ចប់ការអនុវត្តផែនការ ២០២១-២០២៥

 អត្ថបទ៖ ទ្រី ហៀន

ខេត្តកំពត ៖ នៅព្រឹកថ្ងៃពុធ ទី២៦ ខែវិច្ឆិកា ឆ្នាំ២០២៥ គណៈកម្មាធិការអភិវឌ្ឍន៍ទេសចរណ៍ខេត្តកំពត បានបើកកិច្ចប្រជុំយ៉ាងសំខាន់មួយ ដើម្បីត្រួតពិនិត្យ និងឆ្លងរបាយការណ៍បញ្ចប់ការអនុវត្តផែនការអភិវឌ្ឍន៍ទេសចរណ៍បច្ចុប្បន្នកម្មឆ្នាំ២០២១-២០២៥។

 កិច្ចប្រជុំនេះ បានប្រព្រឹត្តទៅក្រោមអធិបតីភាព ឯកឧត្តម មឿង គង្គា អភិបាលរងនៃគណៈអភិបាលខេត្តកំពត តំណាងដ៏ខ្ពង់ខ្ពស់ ឯកឧត្តម ម៉ៅ ធនិន អភិបាលនៃគណៈអភិបាលខេត្ត និងជាប្រធានគណៈកម្មាធិការអភិវឌ្ឍន៍ទេសចរណ៍ខេត្ត និង​លោក ម៉ម ទូច ប្រធានមន្ទីរសាធារណការ និងដឹកជញ្ជូនខេត្តកំពត រួមជាមួយសហការី ព្រម​លោក លោកស្រីប្រធានមន្ទីរ-អង្គភាពពាក់ព័ន្ធជុំវិញខេត្ត លោក លោកស្រីអភិបាល និងអភិបាលរងស្រុក និងមន្ត្រីតំណាងមន្ទីរ-អង្គភាពពាក់ព័ន្ធ។

​កិច្ចប្រជុំបានប្រព្រឹត្តឡើងនៅសាលប្រជុំមន្ទីរទេសចរណ៍ខេត្តកំពត ដោយបានពិភាក្សាយ៉ាងផុសផុលទៅលើលទ្ធផលនៃការអនុវត្តផែនការអភិវឌ្ឍន៍ទេសចរណ៍រយៈពេល ៥ឆ្នាំកន្លងមក ដើម្បីវាយតម្លៃពីសមិទ្ធផល បញ្ហាប្រឈម និងកំណត់ទិសដៅសម្រាប់រៀបចំផែនការបន្ទាប់ សំដៅជំរុញវិស័យទេសចរណ៍ខេត្តកំពតឱ្យកាន់តែរីកចម្រើន៕